Zec 6 | NdeIBE | STEP | Ngaphinde ngaphakamisa amehlo njalo – khona phambi kwami kwakulezinqola zempi ezine ziqhamuka okhalweni lwezintaba ezimbili

Zechariah 6

Izinqola Zokulwa Ezine

1 Ngaphinde ngaphakamisa amehlo njalo – khona phambi kwami kwakulezinqola zempi ezine ziqhamuka okhalweni lwezintaba ezimbili – izintaba zethusi! 2 Inqola yakuqala yayilamabhiza abomvu, eyesibili ilamnyama, 3 eyesithathu amhlophe, eyesine alamabala – wonke elamandla. 4 Ngayibuza ingilosi eyayikhuluma lami ngathi, “Kuyini lokhu, nkosi yami?”

5 Ingilosi yangiphendula yathi, “Le yimimoya emine yasezulwini, ephumayo ekumeni phambi kukaJehova womhlaba wonke. 6 Le elamabhiza amnyama iqonda elizweni elisenyakatho, eyawamhlophe iqonda entshonalanga, kuthi eyawamabala iqonda eningizimu.”

7 Kwathi lawomabhiza alamandla esephuma ayesadalala ezama ukuya kuwo wonke umhlaba. Yathi kuwo, “Hambani kuwo wonke umhlaba.” Lakanye aya kuwo wonke umhlaba.

8 Yase ingibiza yathi, “Uyabona, layana aqonda elizweni elisenyakatho asenike uMoya wami ukuphumula elizweni lasenyakatho.”

Umqhele KaJoshuwa

9 Ilizwi likaJehova lafika kimi lathi: 10 “Thatha isiliva legolide kwabathunjiweyo uHelidayi loThobhiya loJedaya asebebuyile eBhabhiloni. Hamba ngalona lelolanga endlini kaJosiya indodana kaZefaniya. 11 Thatha isiliva legolide wenze umqhele uwethese umphristi omkhulu uJoshuwa indodana kaJehozadaki. 12 Umtshele ukuthi nanku okutshiwo nguJehova uSomandla, uthi: ‘Nansi indoda obizo layo liHlumela, njalo uzahluma endaweni yakhe akhe ithempeli likaJehova. 13 Nguye ozakwakha ithempeli likaJehova, njalo uzagqokiswa ubukhosi, futhi uzahlala esihlalweni sakhe sobukhosi. Njalo uzakuba ngumphristi esihlalweni sakhe sobukhosi. Lokhu kokubili kuzahambelana kuhle.’ 14 Umqhele uzaphiwa u-Iteledayi, loThobhiya, loJedaya kanye lo-Iteni indodana kaZefaniya njengesikhumbuzo ethempelini likaJehova. 15 Labo abasekudeni bazakuza bazokwelekelela ukwakha ithempeli likaJehova, njalo kuzakwenzeka uma limlalela ngokukhuthala uJehova uNkulunkulu wenu.”